| Korsou ban move djadumingu dia 27 di september |
|
|
|
| Friday, 18 September 2009 - 11:42 | |
Manera primintí, Gobièrnu di Teritorio Insular di Kòrsou lo sigui stimulá e pensamentu di movementu masal di pueblo. Despues di e eksitoso programa Kòrsou Ban Move ku a tuma lugá di dia 9 pa 15 di ougùstùs último, un biaha pa luna den e próksimo tres lunanan, lo dediká un dia pa Kòrsou sigui move. Click lesa mas pa mas info...
E próksimo aktividat grandi di Kòrsou Ban Move ta djadumingu dia 27 di sèptèmber 2009, na momentu ku pueblo di Kòrsou kompletu lo ta riba pia pa move den e aktividat di Tae-Bo i baila soda bou di enkargo di Angeline Bakhuis i Sabina Evertsz. E aktividat aki ta kuminsá pa 6:30 a.m. i lo ta den Stadion Ergilio Hato. Riba e mes un fecha aki tambe lo tuma lugá pa promé biaha den kombinashon ku Kòrsou Ban Move, un paseo riba baiskel bou di enkargo di Vista Bike. E ruta ku lo kore ta lo siguiente: Ta sali 6’or a.m. for di SDK, ku direkshon pariba, subi Kaminda George Willems direkshon Ronde Klip, lora na man drechi i subi Bonamweg, lora na man drechi subi Jongbloedweg, Retonde Brievengat, Kaminda Brievengat i finalisá na SDK. Ta un ruta di 10 km durante 1 ora riba un tèmpo suave pa hinter famia Partisipashon na tantu e aktividat na SDK komo paseo riba baiskel ta grátis. A hinka e programa den otro ku na momentu ku esnan di paseo riba baiskel kaba ku nan trayekto, nan tambe lo por partisipá den e cool down stretch masal ku ta tumando lugá den SDK. Pa esnan ku a registrá na promé aktividatnan di Kòrsou Ban Move, nan no tin nodi di hasi esaki di nobo. Pa e partisipantenan nobo, nan por tuma un formulario na B-Fit, Vista Bike, Bentana di Informashon na Breedestraat Punda 39C òf tambe por down load esaki for di e web-site di Gobièrnu. www.curacao-gov.an. Entrega di formulario ta tuma lugá na sitio kaminda a risibí esaki. Tambe lo tin e Bus di Salu ku tur su informashonnan interesante na interes di nos komunidat. Pa mas informashon por tuma kontakto ku Bentana di Informashon na e number grátis 0800-1515. Gobièrnu di Kòrsou ta konvensí ku pueblo lo sigui move i p’esei ta hasi un invitashon pa djadumingu awor dia 27 di sèptèmber. Kòrsou, BAN MOVE!!!! |
