Un grupo grandi di amigu, konosí i tambe fanátiko di Eligio tabata presente pa duna di nan parti tambe rekonosementu na e obranan di Eligio. Durante e akto ofishal di apertura a hiba palabra señora Lianne Leonora, Mènedjer di Departamentu Antiana/Caribana di Biblioteka Públiko Kòrsou miéntras i nos diputado di Kultura señora Merylin Alcalá-Wallé. A toka na Eligio Melfor pa hasi apertura di e eksposishon pa despues invitá tur persona presente pa drenta e sala di eksposishon.  

Ta e intenshon pa e eksposishon keda durante henter e dos “Siman di KULTURSIMO”. Meskos tambe tur hende ta bon biní na tur e programa di Biblioteka Públiko Kòrsou den kuadro di “Siman di KULTURISMO”. Prinsipalmente riba djasabra 19 di sèptèmber durante kua lo tin e gran homenahe na Eligio Melfor – “hi ha ha den Biblioteka ku Eligio serka serka!” E homenahe aki ta keda tené riba e lugá di parker di Biblioteka di 6’or di atardi pa 10.30’or di anochi. Lo tin presentashon di diferente artista ku lo presentá algun obra di Eligio Melfor, ku kontamentu di kuenta, fábula, poema, komedia i músika. E programa aki ta ser realisá ku koperashon di Kas di Kultura i Curacao Tourist Board. Entrada ta grátis.