PAR ta kere ku ta asina fásil nan ta tuma poder for di pueblo. Ta trata aki di un poder ku pueblo tin pa via di elekshon liber i sekreto i pa kolmo preskribí den nos leinan. Akaso PAR ta para riba lei? 

Masha dia Partido MAN ta konsiente i te hasta a yega di denunsia tambe, ku gobernashon di PAR por sòru pa un divishon grandi den e komunidat aki. Ata algun prueba: 

E resultado di referèndem, ku no tabata e resultado ku nan tabata ke, tampoko no a buta nan para ketu i buska formanan pa uni e komunidat aki. Al kontrali, Partido MAN ta mira un aktitut di dirigentenan di PAR pa na un forma agresivo sali i kontestá tur loke kualke suidadano por trese en kontra di nan maniobranan.  

Esaki ta hopi opvio ora ta trata di lider polítiko di MAN, señor Charles Cooper, ta parse manera diferente eksponente di PAR tin komo tarea pa asina Charles habri su boka, nan bin respondé i ataka ku tur medio ku nan tin. E meta klaramente ta pa hasi daño na persona di Charles Cooper.  

Konstantemente, eksponentenan di PAR ta buska moda di hasi komo sifuera ku tur loke Charles Cooper bisa, ta mentira, ko’i loko, no serio òf payasada. E úniko meta di esaki ta pa trese duda den e persona di Charles Cooper. 

Partido MAN, mediante di esaki ta manda un aviso i konseho serio na  eksponentenan di  Partido PAR pa stòp ku e manipulashonnan nan aki. 
 
Lider polítiko di Partido MAN Charles Cooper i otro eksponentenan di MAN ta hasi nan trabou, manera pueblo ta paga nan pa hasi. I kada unu lo sigui, spesialmente den e temporada ku ta bin, ku mas fervor ainda.  

Pasobra awor ku partido PAR i su kompinchinan a kaba di entregá Antia i su islanan den man di Ulanda, i ta kómplise den kontribushon pa trese kolonialismo bek den área di Karibe, nos di Partido MAN lo sigui informá pueblo i vigilá pa e pueblo komprondé presis ta kon a bende nan su patria. 

Partido MAN lo keda oponé  ora bin asuntunan dilanti manera di posponé elekshon, òf hasi kosnan “vooruitlopend” riba un lei ku tin ku regla e asuntu korespondiente, òf manipulashonnan ku tereno di pueblo, òf na un manera fini buta eksponentenan di koalishon riba puestonan ku ta rekerí solisitashon habri, òf riba desishonnan ku ta buta situashon sosial/ekonómiko di nos pueblo bai atras en bes di dilanti, òf desishonnan ku ta hasi nos enseñansa un enseñansa pa otro i no pa nos yunan di tera. 

Di e forma aki Partido MAN por sigui menshoná diferente aktitut di partido PAR, ku nos ta denunsia komo aktonan anti-emansipatorio di nos pueblo. Partido MAN lo sigui ku tur su forsa denunsia esakinan.  

Si esei ta buta ku en bes di kontestá ku argumento alkaso i desente, eksponentenan di partido PAR ta bin ku un aktitut pa hasi daño na persona i karakter di Charles Cooper, lider di MAN, ta pèrdèmentu di tempu.  

Un konseho nos ke duna Partido PAR i esei ta mihó ku nan tuma e tempu i splika pueblo di Kòrsou di kon nan skohe pa bende e pueblo aki su outonomia, su dignidat i su lucha di hopi aña ku Ulanda i no a skohe pa un berdadero emansipashon di e pueblo aki.