E proyekto ta enserá ku klientenan di FMA, ku ta personanan ku a haña nan mes ku e reto di adikshon, ta limpia i prepará diferente muraya den área di Bestuurscollege, ku material ku Gobièrnu ta pone disponibel via di su servisio RASE. Despues hóbennan di skol lo pinta e murayanan den un forma artístiko, bou di guia di pintornan renombrá. E hóbennan lo kuminsá ku e trabou menshoná den e promé siman di sèptèmber próksimo i djarason dia 5 di ougùstùs último, ya kaba e klientenan di FMA a kuminsá ku e trabou preparatorio.

E proyekto ta kuminsá na e muraya di e edifisio di ‘Lonen en Bezoldigingen’ dilanti di Kolegio Ehekutivo na Concordiastraat i e muraya banda di e edifisio di Kolegio Ehekutivo kaminda tin skol Frater Aurelio. Despues lo kuminsá ku e muraya na Zaquitó, patras di GGD.

Pa por realisá e proyekto bunita aki tin un komishon instalá konsistiendo di Kas di Kultura, Servisio di Kultura i Edukashon, Servisio di Informashon i Komunikashon, Sedreko, departamentu RASE, Fundashon Progreso i Desaroyo i Fundashon pa Maneho di Adikshon.

E proyekto lo kulminá den luna di sèptèmber den e simannan ku Gobièrnu ta duna atenshon speshal na kultura i turismo. E komishon, formá dor di e diferente instansianan i fundashon di Gobièrnu, lo wak e posibilidat pa kontinuá ku e proyekto aki. Asina mas muraya na Kòrsou por bira un muestra ku na Kòrsou nos por krea arte konhuntamente, na un manera ku no solamente esnan ku ta traha den e proyekto, pero komunidat total por gosa di e resultado. Den kuadro di esei lo tuma kontakto ku sektor privá tambe.

Riba e potrètnan por mira e momentu ku Diputado sra. Alcalá-Wallé ta splika kiko e proyekto ta enserá, miéntras e klientenan di FMA ta traha riba e muraya. Tambe ta mira kon e mandatarionan mes a bai duna un man den e trabou preparatorio.