Punto di Disputa

Segun informashonnan ku nos ta disponé di dje ta, ku e punto aki, for di luna di mart 2009 tabata un punto di atenshon entre RTV-7 i DUCOS. RTV-7 a mustra DUCOS ku esaki no por i ku nan ta konsiderá e pagamentu di derecho di transmishon manera  e ta keda apliká dor di DUCOS komo diskriminatorio i inhustu. DUCOS di su parti a pone un deadline pa RTV-7, ku nan mester konfirmá nan partisipashon, tèrmino ku a kaduká djaweps siman pasá. Direktor di RTV-7, señor Gerard Wijngaarde a kombersá i trese su preokupashon pa e punto aki serka señor Wim Noordzij, persona enkargá ku asuntunan komersial, sponsoring, advertising i buskamentu di kliente pa DUCOS, kende a ofresé pa diskutí esaki ku señor Guus Dutrieux di DUCOS. E kontesta di señor Noordzij tabata, ku RTV-7 mester paga e suma di € 2.500,00 pa derecho di transmishon di “Zomercarnaval Rotterdam”. N’e momentu ei no a keda RTV-7 nada otro pa gradisí tantu señor Noordzij i DUCOS i notifiká nan ku bou di e kondishon aki RTV-7 lo no por transmití “Zomercarnaval Rotterdam 2009”.  

Kontra di tur su sintimentu, RTV-7 a notifiká tur e partidonan, ku ta envolví den e magno proyekto di transmishon bibu di “Zomercarnaval Rotterdam” pa tur isla di Antia i Karibe, ku e aña aki lamentablemente, debí na kobramentu di un suma eksorbitantemente haltu na solamente RTV 7 i ningun otro kompania di televishon mas na Hulanda, ku RTV-7 lo no por transmití karnaval mas e aña aki. Señor Wijngaarde a notifiká e kompania na Miami ku ta atendé liñanan di transmishon di señal di televishon, ku nan lo no tin nodi di reserva liña mas pa RTV7. Na mes momentu señor Wijngaarde a purba notifiká personanan klave ku tin di aber ku e komunidat antiano na Ulanda pero sin éksito.  

Ku sorpresa, un dia despues di notifiká DUCOS ku RTV-7 no ta transmití “Zomercarnaval Rotterdam” mas, DUCOS ta manda un email pa informá ku RTV-7 no tin nodi di paga e suma di € 2.500,00 mas, pero ku nan ke tende den e próksimo 3 ora kiko RTV-7 ta disidí. Segun informashon, RTV-7 no por a kambia nan desishon, debí na e deadline ku nan tabatin ku a kaduká e dia promé.  

Komunidat Antiano perhudiká

Lamentablemente dor di kobramentu diskriminatorio i inhustu di derecho di transmishon, esun ku ta sali perhudiká ta e komunidat Antiano i Karibense ku ta sigui e karnaval di Hulanda. Di un banda RTV-7 ta splika ku nan ta haña e suma di € 2.500,00 inhustu i diskriminatorio, ya ku e tabata konta solamente pa RTV-7.  Di otro banda un DUCOS, ku tabata negoshá fuertemente pa garantisá, teniendo kuenta ku tempu na nan fabor, ku finalmente RTV-7 lo paga e suma tòg. Un sorto di take it or leave it. Nos a komprondé, ku teniendo kuenta ku e preshon aki, no a keda RTV-7 nada otro di kanselá su plannan pa transmishon i informá su partnernan na tempu pa nan no  haña nan ku gastunan adishonal pa un liña ku nan lo no usa.  

“Zomercarnaval Rotterdam” ta un evento kultural di Hulanda, ku Antianonan bibá na Hulanda 25 aña pasá, na 1984 a kuminsá ku n’e. Un evento ku a bira asina grandi ku awendia ta ser konsiderá e evento kultural mas grandi di Hulanda. Meskos tambe por papia di e transmishon via televishon di e evento aki, ku ta otro grupo Antiano, riba propio forsa a kuminsá ku transmishon bibu di “Zomercarnaval Rotterdam” pa mundu, via di islanan di Antia i di Karibe. Un logro, ku ningun kompania di produkshon di televishon hulandes a realisá i nunka a purba di realisá tampoko, sin mira e parti finansiero promé. Ku otro palabra ku trabou boluntario i ku invershonnan for di propio saku, sin posibilidat a korto plaso pa rekuperá nan invershonnan, e kompania RTV-7 a realisá tur esaki durante último aña i demostrá asina nan preokupashon i bon intenshon pa e komunidat Antiano i alabes yuda alsa i promové “Zomercarnaval Rotterdam”. Nos a komprondé ku RTV-7 den todo kaso lo hasi sierto filmashon i kompilá parti di e karnaval i transmití esaki despues pa nan kliente. Esaki lo no bira un transmishon bibu.