E proseso di ‘upgrading’ a kuminsá for di siman pasa i ta finalisá en prinsipio fin di e siman aki, pero kisas lo kontinuá otro siman tambe. E trabounan aki lo tuma lugá mas tantu den oranan lat di anochi, p’asina klientenan eksperenshá ménos interupshon ku ta posibel. 

Si dado kaso un kliente eksperenshá interupshon, pues si e no por subi internèt, nos ta pidi tur kliente pa no ‘reset’ e modem, sino paga i sende e modem bèk na e kònòpi di ‘on / off’. Si un kliente tin e modèl di modem ku UTS tabatin anteriormente, ku no tin e kònòpi di ‘on / off’, nos ta pidi pa saka e modem pa un par di sekònde for di koriente i despues hink’é bèk. Si dado kaso un kliente keda eksperenshá problema, por yama nos na 9221. 

UTS ta sigui perkurá  pa un kalidat di komunikashon konfiabel i pagabel i un kobertura amplio i lo keda hasi lo máksimo pa aportá na mehorá e kalidat di komunikashon entre hende ku su servisio i produktonan. P’e motibu aki e ‘upgrading’ aki ta nesesario, p’asina UTS por ofresé su klientenan spitnan muchu mas haltu i tambe mas efisiensia den e servisio di internèt. E trabounan di ‘upgrading’ aki ta den kombinashon ku e proyekto ‘Fiber to the curb’, pa trese e kabel di fibra óptiko mas serka di e kliente. Dor di amplia e kapasidat di ADSL di tantu fiho komo ‘wireless’, UTS por brinda klientenan diferente tipo di servisio riba un solo konekshon.  

Gerensia di UTS ta pidi diskulpa pa kualke inkonbeniensia ku e ‘upgrading’ aki por okashoná.