| Subasta obranan traha di Arte na Benefisio di Prinses |
|
|
|
| Monday, 20 July 2009 - 01:14 | |
Den kuadro di selebrashon
di 60 aniversario di Fundashon Prinses Wilhelmina Fonds,
djasabra 25 di yüli próksimo Fundashon Prinses Wilhelmina Fonds
den koperashon ku e konosido artista di arte visual señora Annie Zielinski,
ta organisá un interesante subasta di obranan di arte traha di santu
di laman. E subasta ta kuminsá 6’or di atardi i ta tuma lugá
den “Galeria Kas di Kultura” situá
na Koningin Wilhelminastraat 1 djis na bahada di brùg di Skalo. E subasta
ta habrí pa tur interesado.
Komo un regalo speshal
i un muestra di apresio pa e balioso trabou di Prinses Wilhelmina Fonds
durante 60 aña, señora Annie Zielinski gustosamente a pone diferente
di su obranan disponibel, di moda ku por organisá un subasta, di kua
parti di e fondonan generá dor di e benta ta bai pa Prinses Wilhelmina
Fonds. Tur interesado ta invitá pa partisipá na e subasta aki i atkerí
asina un di e obranan eksklusivo traha di santu di laman, sea pa nan
kas òf ofisina. Eksposishon di señora Annie Zielinski
Na e momentu aki tin
un eksposishon ta kanando di e diferente obranan di señora Annie Zielinski.
Un eksposishon úniko tantu di kuadro komo ophetonan trahá di santu
di laman. Señora Annie Zielinski ta nasé na Aruba pero bibá hopi
aña kaba na Kòrsou. For di su 12 aña señora Zielinski kuminsá eksperimentá
ku pintamentu i obra di man. Na aña 2005 señora Zielinski a kuminsá
eksperimentá ku trahamentu di obranan di santu di laman. Den su obranan
e ta enfoká hopi riba e kultura di indjan Arowak, ku tabata e habitantenan
original di Kòrsou. E anhelo i soño di señora Zielinski ta, pa un
dia e konstruí un siudat ku figura i ophetonan di e indjan Arowak trahá
di santu di laman.
Señora Annie Zielinski,
Prinses Wilhelmina Fonds i Kas di Kultura ta invitá henter komunidat
pa bishitá e eksposishon interesante aki na “Galeria Kas di
Kultura” i alabes ta invitá tambe pa e subasta ku ta tuma lugá
djasabra 25 di yüli pa 6’or di atardi na Kas di Kultura na
Skalo. E eksposishon ta dura 2 siman. Pa mas informashon tokante e eksposishon
i subasta por tuma Kontakto ku señora Helen de Haas na telefòn 434-7315.
|
