| Gobičrno di Korsou cu Siklovia pa pone Korsou move i diberti |
|
|
|
| Friday, 17 July 2009 - 10:20 | |
Servisio pa Komunikashon i Informashon ta invitá henter pueblo di
Kòrsou pa partisipá djadumingu dia 19 di yüli 2009 na Siklovia ku
lo tuma lugá na Mariepampun.
Siklovia ta un evento
organisá dor di diferente servisio i fundashon di Gobièrnu pa henter
famia pasa un dia agradabel i praktiká diferente tipo di deporte pa
di un manera sano hasi moveshon i dibertí. Partisipashon ta grátis.For di 10’or di mainta
te ku 7’or di atardi Martin Luther King Bulevard lo ta será pa tráfiko.
Esaki ta hasi posibel pa kana, kore baiskel òf skate-board riba kaya.
Tambe lo tin oportunidat pa sera konosí ku diferente arte marsial i
praktiká deportenan riba tera i den awa, manera vòlibòl, aerobics,
kayak i bolas criollas.
Pa partisipá òf wak
e diferente aktividatnan deportivo, por pasa e dia ei na Sentro di Rekreo,
na pir di Mariepampun òf na Sportpark Mariepampun. E evento ta unu
pa hende di tur edat. Lo tin stènt di informashon tambe, kaminda ta
duna splikashon tokante por ehèmpel malesa di diabétis, obesitas,
seksualidat i salú hubenil, pero tambe lo splika mas tokante e trabou
di Sedreko i lo tin posibilidat pa hasi masashi.Inisiativa pa Siklovia
ta sali for di e diputadonan sra. Marilyn Alcalá-Wallé i sr. Humphrey
Davelaar, ku komo diputadonan ku ta atendé ku deporte i salú públiko,
ta mira e koperashon akí komo un tremendo manera pa promové i eduká
nos pueblo tokante e mihó manera pa kuida salú. Siklovia ta kuadra
kompletamente den e tema di luna di yüli den nos Aña di Kultura, ku
ta dediká na deporte i weganan di ántes. Sedreko, Kas di Kultura,
Servisio di Kultura i Edukashon, GGD, Polis, Fundashon Mariepampun,
CTB a pone man huntu pa realisá e proyekto.Riba e programa ku ta
kompañá e komunikado akí, ta haña un bista di e diferente aktividatnan
ku ta tuma lugá durante di Siklovia.
|
