Tantu UTS OneNet komo FESEBAKO ta orguyoso di por aportá dje forma aki na formashon di nos komunidat, dor di fasilitá akseso liber i grátis na informashon, ku ta forma e base pa akumulá konosementu. FESEBAKO na su turno tambe ta brinda e servisio aki grátis na públiko atraves di su 22  Sentronan di Bario afiliá na dje. Di e manera aki UTS i FESEBAKO ta kontribuí na forma siudadanonan prepará, responsabel i útil pa nos komunidat.  

Manera ya menshoná kaba, FESEBAKO tin un total di 22 Sentro di Bario afiliá na dje i su meta prinsipal ta formashon i desaroyo di nos suidadanonan riba nivel intelektual, spiritual, deportivo i sosial riba un base no komersial. Entrante luna di yüli 2009 kada Sentro di Bario por disponé di 512 kbps, spit haltu di OneNet internèt. E akseso grátis aki na internèt ta hasi posibel pa nos siudadanonan konektá ku e mundu di posibilidat i akseso na konosementu ku internèt awendia ta ofresé humanidat.  

Akseso na internèt awendia ta un mester. Nos muchanan i siudadanonan adulto no mag keda derivá di e desaroyo aki. Edukashon riba su mes ta un forma efektivo pa kombatí pobresa. Si kombiná esaki ku konosementu i akseso na medionan moderno, nos ta krea oportunidatnan real pa nos hendenan por logra porvenir sostenibel. E echo ku e hóbennan ta lanta bon konektá ku e mundu mas grandi atraves di konosementu i dominio di internèt, ta kontribuí na krea rekurso humano hábil pa enfrentá e retonan di awe i mañan.  

UTS tin un kompromiso ku nos komunidat. P’e motibu aki UTS ta haña importante pa kontribuí na hasi OneNet internèt, ku un spit haltu, aksesibel pa nos hóbennan i siudadanonan atraves di koperashonnan mutuo ku skolnan, biblioteka i FESEBAKO. 

Riba pòtrèt por mira momentu ku sr. de Geus, CEO di UTS ta firma akuerdo ku FESEBAKO, sr. Oscar Betrian, presidente di FESEBAKO huntu ku otro miembronan di direktiva.