Danki e resultado positivo den 2008 UTS, komo kompania propiedat di gobièrnu,  atrobe por bolbe aportá na kaha di gobièrnu, esta na bienestar di nos pueblo.

UTS aparte di ganashi, lo hinka un kantidat di 80 mion florin den kaha di gobiernu.

2008 tabata un aña den kua UTS a proba su balor komo suidadano korporativo engrande ora ku e kompania aktivamente a partisipá den krea e sintimentu di orguyo serka nos pueblo na momentu ku nos Churandy Martina tabata logra hazaña riba kancha den Olimpiada 2008 na Beijing.  E resultado di 2008 ta prueba ku e plan pa “turn around” UTS, ku a kuminsá na 2006, ta resultando eksitoso, danki na trabou dediká di empleadonan di UTS, sosten di Hunta di Komisario i konfiansa di klientenan. 

Resultado komersial satisfaktorio

UTS den 2008 a konosé kresementu riba práktikamente tur servisio i produkto ku e kompania ta ofresé.  Telefon fiho su entrada a keda stabil i e kantidat di klientenan a oumentá. Telefon mobil a konosé un kresementu di 15% kompará ku 2007.  Servisio di internèt broadband a krese ku 37%. 

UTS a logra e resultadonan positivo aki danki no únikamente un maneho di merkadeo integrá, dirigí i agresivo pero tambe e kompania su esfuerso kontinuo pa krea un komunikashon mas habri ku su klientenan.   UTS no únikamente a hiba kampañanan dirigí riba benta pero a invertí tambe den nos ídolonan manera e.o. Churandy Martina i Jair Jurrjens, den eventonan popular manera Karnaval i organisashonnan  importante den desaroyo di nos hendenan manera NAOC. 

A sigui traha riba base operashonal fuerte pa futuro

Den 2008 UTS a sigui traha riba base pa krea su ret di siguiente generashon ku tin base sólido den asina yama “Internet protocol.”  Den futuro serkano UTS lo  ópera únikamente via dos ret ultramoderno basa riba ADSL i e infrastruktura nobo mobil di UMTS. Ámbos ta hasi transporte di data mobil riba velosidat haltu posibel. 

Den 2008 a kontinuá ku e proyekto pa planta e ret di kabelnan fibra óptiko bou di tera tresiendo servisio di internèt di kalidat haltu mas serka di kas i ofisinanan.  A kambia tambe e bòxnan di televishon di TDS rumbo pa e era nobo di televishon digital.  Tele-Curacao a start su proyekto pa digitalisá su transmishon, di tal forma ku e por mehorá su kalidat di transmishon supstansial, oumentá mas kanal den futuro i transmití programanan High Definition. (HD.) 

Operashonnan den eksterior nesesario pa krea mas merkado

Nos merkado ta chikí i kompetensha ku kada dia ta bira mas feros.  Pa UTS sigui tin resultadonan positivo ta importante pa UTS kontinuá ku su búskeda di merkadonan nobo.  Un merkado manera esun di Sürnam tin potensial grandi, sinembargo debí na su grandura e ta eksigí invershon inisial ku talbes ta aparentá grandi den nos konsepto pero ta normal pa kualke kompania di telekomunikashon imbertí si e ke drenta un merkado di e grandura di Sürnam.  UTS entretantu a ahustá su plan di maneho afin ku por logra mira fruta di su operashon na Sürnam mas rápido.  Na mes momentu ta buskando un partner stratégiko pa UNIQA. 

Na Ulanda a renegoshá e kontrakt ku KPN ta loke a kontribuí na redusí e kostonan operashonal.  UTS tin sigur di tin un proposishon interesante pa e su klientenan, unabes e konektá su ret di servisionan entre CHIPPIE na Kòrsou, Bonaire i Sint Maarten, DUTS na Ulanda i UNIQA na Sürnam. 

Na Sint Maarten UTS a kumpra NTG, e kompania mas grandi di internèt na Sint Maarten.  Esaki di bia ta posishoná UTS komo proevedo importante di internèt na Sint Maarten.  UTS aktualmente ta evaluando ku si su operashon na Sint Kitts ta kumpli ku e metanan stipulá den su businessplan. 

UTS ta proba ku un kompania nashonal di telekomunikashon sólido ta sirbi desaroyo di nos pais i adelanto di nos pueblo.  No opstante e situashon ekonómiko mundial difísil i e kompetensha (tin biaha hasta inhustu) fuerte riba nos merkado tòg Gerensia di UTS ta mira futuro ku optimismo. 

UTS ta trahando duru pa terminá 2009 den e mes un posishon bentahoso ku ela terminá 2007 i 2008, esta finansieramente fuerte, ku un operashon di klase i lider den merkado.