| Trinta di Mei 2009 den palabranan di Stanley Brown |
|
|
|
| Tuesday, 02 June 2009 - 11:54 | |
Nos
no por kommemora trinta di Mei sin kommemora e kandela ku a hunga un
rol asina grandi den e revolushon di trinta di mei sinembargo ku e
speransa ku nunka mas nos pueblo lo tin nodi di usa e arma aki pasombra
atrobe no a skucha su gritu di desperashon.Klik read more pa mas informashon...
Ban duna honor na Gutierrez i
Gerardina ku a pèrdè nan bida den e revolushon di 30 di mei 1969, den
Kaya Gerardina-Gutierrez na Berg Altena. Huntu ku nan mi ke honra i
rekorda tambe e lidernan ku a bai promé ku nos manera Wilson Godett,
Amador Nita, Amos Nita, Shon Fe Zimmerman, Meagles Lasten, Otto Zalm,
Fu Thode, Emmy Henriquez , Vernon Brown, Al Peterson I tur ku ma lubidá
nan nòmber. E 300 hendenan ku a ser aresta, e 1200 hende ku a perde
trabou, e 40 mion florin ku e kapitalistanan a perde pasombra nan no
kier a tende.
Esunnan ku a bini awe pa tende mi lele Toni o saka sekreto lo bai kas desapuntá. Mi ke uso e oportunidat úniko aki pa kompartí mi eksperensianan di bida i di 30 di mei ku boso .Un reflekshon balansa , di kiko nos a pasa den, kiko nos a hasi malu kiko nos a hasi bon i kiko nos mester hasi awor. Mi ta un hende ku tin rèspèt pa historia manera ma kaba di demonstrá pero kontrali na otro hende mi ta biba ku solamente 20% di mi pensamentu den pasado ku tòg mi no por kambia I 80% di mi pensamentu den futuro ku podisé mi por kambia. Mi prinsipionan ku semper a guia mi den tumamentu di mi desishonnan ta. 1) Informashonnan ku tin balor p’ami mester sali fo’i un fuente ku mi por konfia. 2)Nan mester zona razonabel. Mi ta un soñadó ku ta pensa. 3) A largu plaso nan mester ta na mi benefisio personal i na benefisio di e klase ku mi ta pertenesé na dje . E klase obreril. Tambe mi ta un hende ku nunka ta fiel na un lider o un organisashon, mi ta fiel na e meta. Realisando kontinuamente ku e ideologia, e pensamentu ku ta kondusí na e meta mester adaptá su mes na inovashonnan i e realidat ekonómiko, demográfiko, geopolítiko di awe. Loke na 1969 tabata progresivo i emansipá hopi bes awe ta reakshonario, antikuá. Manera e gritu pa independensia ,pa mas outonomia, pa divishon rasial ta ehèmpelnan palpabel di biba den pasado. Un lider den siglo 21 semper mester ta pragmátiko I dispuesto na adaptá su mes na sirkunstansianan di kambio internashonal I nashonal manera formamentu di blòknan ekonómiko, globalisashon, krísis mundial i multikulturalisashon di su pais. Konsekuentemente mi tin solamente un amigu, siensia i bèrdat i un enemigu, ignoransia i mentira. Naturalmente mi ta kere den demokrasia , ku ta e rekonosimentu di e lucha entre esnan ku tin i esnan ku no tin pasombra sin distinshon di klase, edukashon, género, tur hende tini derechi di voto. Sinembargo mi tin ku konstatá si, ku e derechi di voto no a duna e obrero ni poder, ni trabou, ni hustisia soshal. P’esei no opstante ku hopi bes resultadonan di revolushonnan rònt mundu no ta pa semper, ami ta sigui kere ku kambionan soshal ta bini dor di wèlganan, revolushonnan, demonstrashonnan riba kaya. P’esei pa awe kompaña mi ku mi promé Biba 30 mei ‘69. Manera tur hende pober sa ,ami tambe a bin realisá ,sigur despues ku Wilson Godett, Bebe Rojer, MacAlberto i ami a pèrdè nos trabou, ku no opstante tur rèspèt pa Bandera, Himno, Seú ,Tambú, Papiamentu, outonomia i dignidat , realidat históriko ta primeramente un realidat ekonómiko kompaña pa e lucha pa rekonosementu. Gritunan nashonalista pa promové outonomia, gritunan sikológiko pa dignidat I rèspèt semper ta sekundario na nos realidat ekonómiko. Nos trabou,nos entrada, nos kuido médiko,nos edukashon,nos kas i kuminda riba nos mesa, ta bini na promé lugá I no nos bandera, nos moneda, nos lenga, nos pais. Weta kon rònt mundu míles i míles di hende ta bandoná nan pais pa un mehor bienestar ekonómiko. Ma realisá tambe ku nos mester ta konsiente ku nos ta biba den un sistema kapitalista ku ta dividí nos den klase. No ta e makamba ta “verdeel en heers” pero ta e sistema kapitalista ku ta dividí e makamba tambe. P’esei union no por eksistí nunka. Nos interes semper lo ta kompletamente otro na e interes di nos doño di trabou o na esun dje klase elitario polítiko ku a forma su mes atraves di añanan. Lo por surgi momentonan históriko manera den un krísis , un referèndem, ku nos interesnan definí por kuadra momentaniamente ku otro, pero manera e krísis pasa e desunion lo surgi atrobe. Hasta den e miembresia di e mesun klase, manera nos ta eksperensiando awe na Korsou no por tin union kompleto den e sistema kapitalista. Mi konklushon ideológiko ta ku awe en dia nos mester sigui wèlga I lucha na promé lugá pa desaroyo soshal-ekonómiko i no pa duna kualkier hende poder polítiko o duna un polítiko o un pais ménos o mas outonomia. Rèspèt i dignidat ta kuadra ku nos entrada, nos leinan sosial, nos edukashon. E manera ku nos ta kuida nos ansianonan, nos presunan,nos hendenan deshabilita i no ku nos nivel di outonomia. Awe ku nos ta paga un sirbiente di kas 1200 heldu pa luna ( 25% di e suèldu di un mener di skol) nos tin mas rèspèt pe ku dia nos tabata paga e 40 florin pa luna promé ku 30 di mei.( e tempu ei 3% di un suèldu di un mener di skol Ban pa trinta di mei 69. Promé ku 30 di mei 69 no tabata eksistí demokrasia ni prensa liber na Korsou. Ku volmacht tabata kumpra míles i míles di voto. Partido Demokrat tabata doño di dos korant i misa katóliko di esun otro. Poder ekonómiko, poder polítiko I poder kultural tabata den man di hende blanku. Religion tabata obligá i dikta nos di pensa manera nan a bisa nos ku nos mester pensa. Muhé kasá no tabatin e derecho di sera kòntraktnan. Diskriminashon I rasismo tabata reina I tabata opstákulo hende pretu yega na puestonan klave. Hende pretu ku eksepshon di un hende pretu, hopi bes Dr.Lashley, ku tabata ser usa pa tapa e bèrdat di e rasismo no por a bira miembro di Rotary, Lions, Klup van Engelen, Golf klup Emmastad, Kabrieten o partisipa nan nan fiestanan. Eksplotashon ekonómiko tabata normal, un mucha muhé ku tabata traha den pakus tabata gana 100 pa luna, mientrastantu un mener di skol tabata gana 1200 pa luna.= 12 bes mas tantu. Sindikalismo no tabata tin e nivel di organisashon I poder ku e tin awe. Suèldu mínimo, lei di retiro no tabata eksistí. Tambú tabata prohibí. Papiamentu tabata ser menospresiá. Kasnan, trabou, ònderstant, bekanan, fiansanan di banko di krédito di pueblo, tabata ser repartí bou di famia, amigunan polítiko i bysidenan. Di e 20.000 hendenan sin trabou ta 600 kompinchi, amiganan íntimo di e diputado tabata risibí ònderstant. No tabata tin ni 500 kas pa pueblo Korupshon tabata eksistí na gran eskala sin ningun konsekuensia. Prison tabata pa hende pretu so. Parlamento tabata un rùber stèmpel I gran mayoria tabata ámtenar kobarde sin muchu edukashon. Kontrolaria general no tabata funshoná . Shell, huntu ku Banko Maduro, tabata dikta manera nan ke, I paga e impuesto ku nan ke. Nan tabata un gobièrnu den nos gobièrnu. Tabata reina un diktadura di partido Demokrat I un miedu pániko pa nan represayanan . Nan tabata traha leinan di e momentu na nan interes pa protehá nan monopolio i poder. Konosí tabata e hòmber ku e buki pretu ku tabata kana rònt den tur departamentu di gobièrnu ku tabata nota tur kos pa partido i ku tabatin mas poder ku e hefe. Polis i hustisia tabata e man represivo, vengativo, di partido demokrat. Si bo no tabata Demokrat bo no por a bira polis Konkluyendo. Promé ku 30 mei ’69 den Korsou tabata reina un kapitalismo no sivilisá kompaña pa rasismo, diskriminashon, abusunan seksual, diktadura i miedu. Hopi miedu. Mi ke usa e momentu históriko aki pa puntra públikamente unda na 1969 tur esunnan manera Chin Behilia, Don Martina, W.Lourents, Yandi de Paula tabata ora pueblo tabata biba no solamente den pobresa I miseria pero tambe den e trouma di rasismo, diskriminashon i miedu? Unda nan tabata ora Godett, Bebe Rojer, Mac Alberto i ami a pèrdè nos trabou? Awe Chin por kanta ,Lourents por zundra Anthony Godett i ami, Don por kritiká, pero e dianan ei nan tabata tin miedu di habri nan boka. Ta un simpel trahadó den haf Wilson Godett I un kriadó di porko i eskritor Amador Nita I un hóben di apénas 30 aña, un simpel mener di skol, stanley brown tabata tin e kurashi I e kurason pa aktua riba e gritu di e pueblo. Pa wèlga, pa publiká Vitó i tene demonstrashonnan tur djasabra riba Gomez plein. Pa bai será i pèrdè nos trabou manera a sosodé ku Wilson Godett i ami mas ku un bes. Awor ku despues ku nos a siñá e sistema kapitalista ku e tin ku sivilisá aki na Korsou tambe, siña e makamba I spesialmente e élite blanku lokal pa respetá nos, nan ta manera un Tula ku a lanta fo’i soño despues ku katibu a ser liberá i ta grita manera señorita di pushi sa grita. Hasta despues di a organisá I ehekutá e revolushon di 30 di mei NOS di FOL no por a haña hende ku awe ta yamá nan mes kompatriota ,stimadó di Korsou pa subi nos lista pero mester a bai elekshon ku 7 hòmber. Godett, Nita, brown,Monte ,Medina, Winklaar i Diaz. Ta nan ta nos héroenan. Laga nos honra nan i laga nan sigui honra manera nan a hasi den nan marcha frakasá nan héroe Fein Jonckheer gobernador, abusador,rasista, ku e revolushon di trinta mei a kore ku ñe. Pa di dos bes awe Biba 30 di mei. Awe, meskos ku Wilson Godett i Amador Nita tambe tabata wet’é, ami ta weta 30 di mei komo e lastu guera den Caribe di liberashon i vengansa kontra e abusunan históriko di sklabitut, kolonialismo I kapitalismo no sivilisá den e ekonomia di plantashi. P’esei despues di e guera di trinta di mei ma ferwaktu ku nos i e kolonisador lo a sera pas ku otro, ku e minister presidènt di Ulanda di e tempu ei Piet de Jong huntu ku La Reina Juliana lo a bai para riba e balkon di e palasio na Dam, un palasio ku West Indische Compagnie a traha, ku sèn gana den e negoshi di katibu I na un manera dramátiko I sinsero pidi NOS pordon pa e barbaridatnan ku Ulanda a kometé durante e añanan di sklabitut I kolonisashon pa despues konhunto nos sigui desaroyá nos pais na interes di e pueblo. Ainda no ta lat pa nan hasié. Sinembargo loke a sosodé ta ku Ulanda no a pidi despensa pero a sigui malkriá nos i nos a sigui malgastá e sèn kambiando solamente white power pa black power I e lucha rasial a kontinuá te awe I e desaroyo a stanka manera e ta stanka semper kaminda tin konflikto. Te awe hopi di nos no ta realisá ku e obrero pretu no ta enemigu di e obrero blanku vice vèrsá e obrero blanku tampoko no ta enemigu di e obrero pretu . Nos enemigu komun ta e polítiko elitario pretu o blanku, e doño di trabou pretu o blanku. E prensa kumprá. E religion diktatorial . E banko. E sistema kapitalista no sivilisá. Podisé abo influensiá pa e propaganda negativo tokante 30 di mei ku ta pint’é manera un disturbio ku a sali fo’i man dor di ekstenso usa di alkohòl ta pensa ku muchu kos no a kambia despues di 30 di mei i ku 30 di mei tabata un dia pretu den nos historia na lugá di ta un dia históriko, un revolushon ku a kambia nos mentalidat i a sivilisá nos sistema kapitalista. Bo por bisa ata korupshon na gran eskala ta eksistí ainda, ata 26.000 hende ta biba den pobresa I miseria, ata nos debe astronómiko, ata ,ata, ata Parsialmente bo tin rason pasombra despues di 30 di mei na lugá di sigui bringa e sistema kapitalista no sivilisá i sera pas ku e kolonisador manera ma bisa kaba a kambia e sistema di poder blanku pa un sistema di poder pretu kaminda na lugá di Fein Jonckheer I su famia a bini hendenan pretu na mando ku a sigui ku e mesun komportashon oportunista ,korupto, goloso na lugá di a sòru pa e bienestar general. Sindikatonan a bira partidonan polítiko. Bandera i himno rèspèt pa nos kultura, dignidat, papiamentu, mas outonomia a bira e palabranan mágiko na lugá di e pan i rèspèt di un trabou, entrada sosial, kuido médiko, enseñansa, kuido pa ansianonan ku Godett, Nita i ami a bringa pe. Nos a sigui hasi kos di bon bida, pidiendo I a hañando regalunan kostoso di Ulanda ku nos no por mantené, ehekutando nos persepshonnan di e nivel di bida kostoso di Ulanda, privilegiando bysidenan, famia i amigunan polítiko. Nos no a kontrolá e kriminalidat Internashonal ku a drenta nos fronteranan, nos no a desaroyá nos enseñansa na e nivel nesesario pa un pais den desaroyo pero a skohé pa mitar dia skol. Nos no a kontrolá nos korupshon polítiko. Nos no a kontrolá huida di nos hóbennan I intelektualnan pa Ulanda. Nos, e pueblo atrobe a ser defroudá e bes aki pa nos mes hendenan i nos mester a kuminsá guli bolita pa sobreviví i hui bai Ulanda . Sinembargo apesar di tur nos fayonan i tur intento pa demonisa i kumpra e revolushon i su liderazgo. Nos a logra: 1)Ku ayudo di un sindikalismo militante manera di AHU (Wilson Godett) Umuc (Willy Haize), Boneco(Erwin Koenze), Cadmu(Harold Martis) ABVO(Bebe Rojer), BTG(Mac Alberto), PWFC (On-A-Kwie ),VLKC(Errol Cova),i aktivistanan sosial manera Yellie Alkema, Adry Koenen,Lolly Daal , Richard Hooi, Eugene Godfried, Shon Benchi, Pater Romer, Lelia Pieters Kwiers, Gladys Dorego, Mirtha Cijntje, Yvette Raveneau, Joceline Clemensia, nos a sivilisá I demokratisá e sistema kapitalista lokal parsialmente. A bini lei di retiro, leinan di suèldu mínimo. A bini lei pa muhé kasa por sera kontraktnan ku tabata eksistí fo’i 1956 na Ulanda. Indexering. Emansipashon di hende muhé. Redistribushon di bienesnan kolektivo mas hustu. Awe un mucha muhé den un pakus ta gana 1200 heldu I un mener di skol 4800= 4 bes mas tantu. No 12 bes manera tabata promé ku 30 di mei pa mas ku 20 aña largu. Di e 20.000 hende sin trabou 10.000 a haña ònderstant partikularmente hende muhé ku yu. A traha míles di kas pa pueblo. 2)Poder polítiko i puestonan importante a bini den man di hende pretu. 3)A bini rèspèt pa nos kultura, lenga, koló, medio ambiente. 4)Diskriminashon I rasismo blanku a desaparesé pa un gran parti i awe hende pretu por bira miembro i drenta den tur klup. 5) Edukashon a bira gratuito pa un i tur. 6) A bini libertat di prensa, partidonan polítiko i demokrasia na lugá di sensura i diktadura.. Votamentu ku volmacht a ser eliminá. 7)Nos a bira mas mòndu i ta papia, kritiká sin miedu. 8 A bini hopi mas medio di komunikashon i kosekuentamente a bini mas libertad den Prensa. Na 1989 ora e sistema komunista a kai den otro I awe na 2009 ora e sistema kapitalista ta kayendo den otro ami a i ta konkluí pa desaroyo di nos futuro na interes di un bienestar general ku ni independensia, ni e modelo di Statüt, ta kumbiní nos . Futuro di Korsou mester di un modelo nobo kaminda nos lo mester bai traha estrechamentu huntu den un bloke ekonómiko ku un kultura sosialista pa haña forsa ekonómiko i pa por distribuí mas hustu loke Korsou ta produsí. Mi tin un di nos lidernan históriko Dr.Da Costa Gomez mi tras ku den pasado a bosifera kaba ku un outonomia total, un independensia lo stanka nos desaroyo i ku nos futuro briante ta mara na bira parti integral di e kultura i ekonomia di Reino. Mi tin un lider polítiko mi dilanti :Ramoncito Booi ku a skohe ku su pueblo e modelo di integrashon. Ei ta nos futuro pueblo I no den Caricom kaminda nos tin un nivel di bida kaba danki na nos relashonnan estrecho ku Ulanda ku ta 4 bes mas haltu ku esunnan mas mehor den Caribe. Pa no papia mes di e 40 bes mehor ,ku esunnan mas atras den Caribe. Si nos no kambia e modelo di Statüt mi ta premirá ku e Si di e referendum lo trese un alivio pa 5 aña o mas pero nos yunan lo heredá loke nos I nos antepasadonan a planta. Nos mester kambia e modelo aki pa sea unu ku ta independensia ,ku lo hiba nos na un nivel di bida paresido na esun di Barbados, 4 bes ménos ku nos a kustumbrá di dje o pa unu di integrashon ku lo hiba nos na un nivel di bida manera esun di Ulanda, 4 bes mas mehor ku nos a kustumbrá ku ñe. Ta nos mester skohé ki futuro nos ke pa nos mes i nos yunan. Ami ta skohe pa mi yunan bai dilanti I manera tur otro pais ku a skohé pa adelanto mi ta dispuesto pa entregá mi outonomia, mi moneda, pa mas dignidat, pa mas ekonomia, pa mas leinan sosial, mehor edukashon, kuido médiko etc.. E makamba ku ta traha den un pakus no ta e enemigu di un yu di Korsou ku ta traha den un pakus. Nos tur dos su enemigu ta e sistema kapitalista no sivilisá ku ta privilegiá te ainda 20% di nos poblashon ku 60% di loke e komunidat ta produsí i ta laga e sobra 40% pa restu di e komunidat. E sistema kaminda unu tin un pisina i e otro un no por hala w.c. ora e kaba urina pasobra e ora ei e no por paga su kuenta di awa mas. Kaminda tin míles di mucha ku no a kome promé ku nan bai skol. Biba 30 di mei pa di tres bes awe pero stòp di wak patras I ban pe e futuro. Historia di siglo 20 no tin den dje un programa pa siglo 21. Mi ta hopi optimista pa futuro di Korsou. Mi tin fe den nos yunan. Ban duna nan un tata i un mama ku nan por ta orguyoso di dje. Ban uni forsa ku nos klase, nos gremio na Ulanda i Europa pa aki tambe nos por realisá porfin e dignidat ku Wilson Godett, Amador Nita i Stanley Brown a bringa pe. Un Korsou ku trabou, edukashon, salubridat públiko na nivel. Kriminalidat kontrolá. Kas pa pueblo. Penshon di behes ku por biba fo’i dje. No un Korsou ku na promé lugá e dignidat di bandera, himno, outonomia,papiamentu , seú, tambú pero kaminda 26. 000 mil hende ta biba den pobresa i miseria pero un Korsou ku na promé lugá e dignidat di un bienestar general, un prosperidat akseptabel pa un i tur. Ban sera pas ku e makamba ku a siña su lès 30 di mei i p’esei a regalá nos fo’i despues di 30 di mei 200 mion pa aña i awe den siglo 21 ta mustra nos ku e ta dispuesto atrobe di akseptá su debe moral na nos, ku ta bai kost’e 4,2 mil mion florin, 263 florin pa kabes di kada makamba i na interes pasombra e aña aki e tin ku fia e sèn aki 18 florin pa kabes Brasa bo bisiña, stim’é sea ku e ta makamba, chines, haitiano, latino, portugues, líbanes, surinameño, indio,dominikano. Ami ta stima boso. Mientrastantu ku nos ta brasando otro grita huntu ku mi. Biba 30 di mei ’69. Si, biba 30 mei ’69. |
