| Rekta final rumbo referčndum |
|
|
|
| Monday, 04 May 2009 - 14:51 | |
|
Nos a drenta luna di mei, luna di un referèndum
históriko. Poko poko pero sigur no solamente pueblo ta formulando nan opinion
final sino tambe organisashonnan di interes ta formulando nan opinion riba e
referèndum. Klik read more pa mas informashon...
Den un pais demokrátiko no solamente ta derecho di organisashonnan
sosial di formulá nan opinion sino ku pa gruponan di interes ta asta un
obligashon síviko. Un organsishon di interes semper ta yuda orienta su
miembronan abase di su interes spesífiko. Ta den e kuadro aki por ehèmpel VBC
ta tuma su posishon polítiko riba tur akontesimentu i ta purba influensha no
solamente su miembronan sino tambe e pueblo di Korsou. Di otro banda ta di
lamenta ku algun sindikalista a disidí di keda neutral den un proseso asina
importante ku ta un eskoho den e proseso di emansipashon di nos pueblo. Un
proseso ku sin duda lo tin konsekuensha pa e klase trahado di Kòrsou. E proseso
aki sigur ta importante pa e klase trahadó di Kòrsou, ya komo ku e klase
trahadó ta esnan ku básikamente ta karga desaroyo produktivo di nos país. Ta den
e kuadro aki den kualkier análisis sosial e klase trahadó hamas por bai kontra
di e prinsipio di outogobernashon di nan país. Esaki debí na e echo ku e ta
mará na e manera ku e klase trahadó mester logra seguridat di trabou,
protekshon laboral, libertat sindikal, desaroyo individual i kolektivo. E
eskoho di e klase trahadó pa bai kontra di kolonialismo i rekolonialismo ta
grabá den tur organisashon di trahadó di tur tendensia ideológiko. E proseso di
emansipashon ta un derecho humano i tur derecho humano ta mará na tur ideologia
sindikal eksistente. Pues e echo ku algun sindikalista no ke asumí nan
responsabilidat pa yuda orientá e trahadonan no ta kita nada na e direkshon di
tur movementu di trahadó na mundo esta pa boga pa outodeterminashon di tur
pueblo manera e ta ankrá den e karta magna di Nashonnan Uní. Pues Aliansa
Patriótiko ku ta un movementu di masa ta konta ku e sentimentu profundo di kada
trahadó pa sali na defensa di nan digndat, dignidat di nan kompañero i dignidat
di e pueblo di Kòrsou. Ta p’esei e klase trahadó di Kòrsou por konta ku Aliansa
Patriótiko ku den un proseso asina fundamental hamas i bou di ningun
sirkunstansia por keda neutral. Rekolonisá e país aki ta nifiká rekolonisá e
klase trahadó tambe. Un trahadó na e momentunan desisivo aki hamas lo laga su
prinsipionan laboral kai. Ta den e kuadro aki Aliansa Patriótiko ta konta ku e
klase trahadó masalmente lo vota kontra kolonisashon i rekolonisashon. Tin kos
ku por i tin kos ku no por. I kolonialismo i rekolonialismo den pleno siglo 21
simplemente NO por. Ta p’esei nos no ta kansa di reafirmá ku NO ta keda NO,
punto.
|
