| E klňk di desesperashon a bati |
|
|
|
| Monday, 27 April 2009 - 08:58 | |
|
Despues di e eksitoso marcha
di rechaso “Di Tula pa Brion” di e bloke “NO” amigu i enemigu
a realisá ku no ta plaka ta tur kos ni no ta plaka ta manda. Aliansa
Patriótiko a logra pone miles di hende riba pia sin tabata tin ku primintí
banda musikal òf pasashi pa Miami. E señal aki a pone e klok di desesperashon
di bloke si bati. Klik read more pa mas informashon...
Nos por a mira esaki na e biahe urgente di Ank Bijleveld
pa Antia Ulandes kaminda a bolbe uza e mesun táktika bieu di
sakudi ku saku di plaka. Di e forma aki ketu bai Ulanda ta sigui mete
den nos asuntunan interno i trata di influenshá resultado di nos referèndem.
Un referèndum ku pakolmo ta den kuadro di nos derechi di outodeterminashon.
Nos ta puntra nos mes: “Nashonnan Uní ta na altura di loke Ulanda
ta hasiendo? I si Nashonnan Uní ta na altura di esaki; kon por ta ku
Nashonnan Uní por permití Ulanda viola resolushon 2625 i 1514 di tratadonan
internashonal di e forma aki anto bes tras bes sin hasi of bisa Ulanda
nada?” Komo sifuera no ta poko a kuminsá
mek riba e gruponan mas bulnerabel den nos komunidat kual ta nos hobennan
i nos grandinan penshonado. Despues di a manipulá e hobennan ku grupo
di rèp, laptop i I-phone awor ta bayendo den bario poniendo bandanan
musikal pa asina konvensé pueblo vota si. Nos ta puntra nos mes: “Ta
e tipo di manipulashonnan aki ta e bienestar ku bloke SI ta propagandiando?
Ta kumpramentu di pueblo su voto ta bienestar?” Ta e tipo di manipulashonnan
baho aki ta pone e lema ku Aliansa Patriótiko a bin ta uza haña mas
forsa, kual ta: “Nos dignidat bo no por bendé i sigur bo no por kumpré!” Pa loke ta trata nos grandinan
mirando e medida ku botikanan a tuma ta parse ku esnan ku ta sostené
e bloke di SI a sera kabes pa kastigá nos grandinan dor di no aseptá
karchi di FZOG mas. Di e forma aki ke obligá nos grandinan pa vota
si sino nan no ta haña remedi. E desaroyo aki ta parse un konspirashon.
For di ora tin ku kastigá, obligá i manipulá pueblo pa e vota si,
mas i mas nos ta konvensí ku e pakete aki sigur no ta kumbini pueblo.
E pregunta ku ta surgi aki ta: Si Ulanda ta yudando nos i si plaka a
kuminsá bin for di 1 di aprel manera Zus i Anke a laga sa, dikon mester
kastigá nos grandinan di e forma aki? Manera ya nos a bisa den nos
komunikadonan anterior nos ta antisipá un guera shushi di parti di
bloke SI. Awor ku ta falta menos ku tres siman pa e referèndum ta mas
shushi so e kampaña aki lo bira. Nos ke pidi pueblo keda pendiente
komo ku loke ta parse un parti di e manual pa e guera shushi aki a kai
den nos man. Nos ta aberiguando algun detaye promé ku nos kompartí
esaki ku pueblo. Ta hopi ta e karchinan di telefon,
I-phone, karchi pa konsierto i bandanan musikal ku nan lo paga pa kumpra
pueblo su voto. “Pueblo para duru i analisá
bon. Wak ken ta esnan ku ta manda bo vota si, i wak kon nan ke konvensé
bo vota si. Despues di un bon analisis e úniko konklushon ku bo por
saka ta ku: “bo dignidat, bo libertat i bo outonomia “ni se compra
ni se vende”, pues NO ta keda NO punto!” Por último nos ke pidi bo
pa keda pendiente pa e siguiente anochinan di informashon ku bloke
NO lo organisá huntu i ku lo bai ta grandi. E bloke NO lo sigui duna
informashon paso nos ta konvensí ku Kòrsou tin muchu mas na siudadanonan
konsiente ku siudadanonan manipulá.
|
