| Preparashonnan pa selekshon di beisbol pa Weganan di Reino ta kana bon |
|
|
|
| Friday, 17 April 2009 - 13:59 | |
|
Faneyte i su tim di tékniko, ta tene treinen di
selekshon riba diferente fèlt na Kòrsou, ku hungadónan di e diferente liga, pa
yega na e tim di beisbòl ku lo representá Antia na Aruba den yüli próksimo. E
20 hungadónan entre 14 i 16 aña di edat, ku a partisipá na e try-out riba fèlt
di Kolebra Bèrdè siman pasá, ta mustra di ta komprondé e seriedat di e
selekshon. Ku karanan desidido nan ta mustra disiplina miéntras ta ehekutá e
diferente tarea. E hóbennan, den e kaso akí di liga Willemstad, sa ku ta tiki
hungadó so lo keda selektá. Eskoho di e diferente hungadó ta tuma lugá pa medio
di un formulario di evaluashon. Selekshon di Antia lo konsistí di hungadónan di
e diferente isla di Antia. I meskos ku na Kòrsou, e dianan akí e diferente tim
di Boneiru, Sint Maarten, Saba i di St. Eustatius tambe ta tene ‘try-out’ pa
selektá nan mihó hungadónan. Weganan di Reino, meskos ku Weganan Olímpiko, tin
komo meta ku deporte mester sòru pa solidaridat. Durante di e treinen di
selekshon e hóbennan ta mustra di ta biba e meta ei. “Hasi bo bèst, ba tende”,
un left fielder ta apoyá su amigu ora esei tin ku mustra su abilidat komo
picher riba petishon di Faneyte i su tim di treiner. E siman akí lo tuma lugá e
último try-out riba fèlt di Montaña. I despues Faneyte por forma su tim definitivo ku lo kompetí kontra di
timnan di Ulanda i Aruba. Faneyte ta kontentu ku e nivel i forma di e hungadónan:
“Pero mi ta haña e determinashon i e
seriedat ku nan ta mustra, hopi mas importante na e momentu akí”.
|
