| Laboratorio di Awa di ADC akreditá |
|
|
|
| Friday, 27 March 2009 - 12:03 | |
|
E laboratorio di Awa di ADC a risibí
e rekonosimentu ofisial di nan kapasidat den kuadro di nan tareanan
spesífiko ku nan ta ehersé. E rekonosimentu aki a wòrdu otorgá
pa e instansha outorisá na Hulanda, kual ta ‘Raad voor Accreditatie’. Akreditá ta un palabra dèfteg pa bisa
“ADC su resultadonan ta konfiabel”. Esaki anto ta kaminda un terser partido,
den e kaso aki ‘Raad voor Accreditatie’, ta skibi un garantia pa
ADC den kual e ta bisa ku ADC su produkto, proseso òf servisio ta kana
di akuerdo ku nan eksigensia nan. Pues e ta un rekonosimentu ku bista
riba futuro. Den mayoria kasonan lei ta imponé sierto eksigensia pa
produktonan. Gobièrnu ta di opinion ku den e kuadro ekonómiko i sosial
ta di sumo importante pa tin un awa limpi. Ta pa tal motibu ADC tin
ku perkurá pa Gobièrnu pa e kalidat di e awa ta kumpli ku eksigensianan
internashonal. Gobièrnu a pone komo kondishon den e dokumento di e
‘Landsverordening Drinkwater’ ku ADC mester akreditá e trabounan
ku ta sosodé den e laboratorio di awa pa mas tardá aña 2008. Na desèmber
di 2008 tur e eksigensianan pa akreditá a wordu entregá i awe 25 mart
2009, e instansha ‘Raad voor Accreditatie Nederland’ a duna di konosé
ku ADC su laboratorio di Awa ta kumpli ku e eksigensianan pa akreditá.
Awendia e nesesidat pa tin garantia riba kalidat di produktonan i servisio
ta oumentando tantu nashonal komo internashonal. ADC por brinda e siguridat
aki pa loke ta awa. ADC ta brinda abo komo su kliente un konfiansa hustu,
den su kapasidat pa duna bon servisio. Ta importante pa kompania nan
manera kompanianan di awa, hotèlnan, fábrika di awa, fábrika di eis
etc. etc. pa laga ehersé kontròl riba e kalidat di e produkto dor
di un laboratorio rekonosé i akreditá. ADC ta orguyoso di un proseso ku pa mas
o ménos 1 aña pasa e promé piedranan a wòrdu pone, ku awe esaki
tin un resultado eksitoso. Esaki ta indiká ku ADC ta trahando konforme
normanan di kalidat rekonosé internashonalmente i ku tin enbèrdat
tur kos den kas pa traha na desaroyonan mas i mas prometedor. Esaki
ta nifiká spesífikamente ku ta trahando segun normanan i ku pa promé
bes por duna e garantia riba sierto kriterianan. Akreditashon ta nifiká
ku ADC ta garantisá e kompetensha tékniko di e laboratorio di awa. Un akreditashon ta solamente e kuminsamentu
di un desaroyo kontinuo ku no tin final. Awor mester sòru pa riba nivel
di normanan internashonal keda mantené e akreditashon aki.
|
