Servisio pa Komunikashon i Informashon ta informá ku aña di Kultura ta un aña spesialmente deklará dor di gobièrnu di Kòrsou, pa kada un di nos ku ta biba na Kòrsou dediká atenshon na otro i yuda konstruí un nashon. Ta un pueblo uní so por konstruí den un direkshon. E union akí nos ta logra ora nos ta Lanta nos Kara i Biba nos Kultura.

Kiko ta kultura? Kultura ta e manera ku hende ta anda ku otro i ku grupo di hende. E manera ku hende ta trata otro, biba ku otro, forma famia, forma grupo, traha huntu, organisá aktividat, rekreá etc. Kultura ta tambe e manera ku hende ta anda ku su medio ambiente ku flora, founa etc. E manera di anda di hende ta tuma lugá den un kuadro spesífiko di balor, idea, idioma, kerensia, norma i regla. Pa medio i den e kuadro kultural akí hende ta husga, pensa, opiná i tuma desishon. E manera di anda akí (kultura) a krese den tempu i ta suheto na kambio konstante.

Generalmente hopi hende inkluso profeshonalnan ta konsiderá únikamente arte manera músika, teatro, baile, pintamentu etc. komo kultura. Esaki ta un aplikashon delegá di e konsepto kultura. Sigun e konsepto delegá akí, kultura ta tur forma di arte ku hende a produsí den kurso di tempu. Esaki ta nifiká ku kultura den e konsepto akí ta relashoná únikamente ku produkto ku balor artístiko ku ta bini entre otro di pintor, keramista, kompositor, koriógrafo i eskritor.

Hende ta krea tambe den su relashon ku otronan i ku naturalesa rondó di dje kerensia (religion), idioma (Papiamentu), lei (lei di penshun), moral (pedofilia ta prohibí), kustumber (kome den tayó) sierto komportashon, tradishon, ritual, norma, balor, institushon, etc. Esakinan pa satisfasé entre otro nesesidatnan no material, spiritual. E konsepto amplio di kultura ta papia di kultura material i kultura no material, kultura spiritual.

Ta e kosnan ku hende ta produsí, krea den su bida diario, nos ta yama ekspreshon di kultura. Nan ta sea material òf no material. Bou di ekspreshon di kultura ta kai pues un kantika di piki, un kustumber (p.e. kumindá ora ta drenta un sala) un kerensia (kome bonchi kòrá djaluna) i tambe un pal’i funchi, i un dakue. Pues no ta solamente arte ta ekspreshon di kultura.

Den su konteksto amplio, Gobièrnu ta invertiendo mas i mas den promové i mantené kultura di Kòrsou. Esaki Gobièrnu ke realisá konhuntamente ku tur otro partner na Kòrsou manera negoshinan, gruponan organisá, NGO, etc.

Pa aña 2009 pa Kas di Kultura tin Naf 3.657.512 presupuestá. Banda di e suma menshoná, Kas di Kultura a risibí na fin di aña pasá, un montante di

Naf 100.000 pa aktividatnan na prinsipio di aña 2009. Ademas di esei, tin montantenan adishonal reservá pa Kas di Kultura pa realisá e siguiente trabounan:

Remodelashon di Sentro di Rekreo Lagun Naf 250.000

Museo Tula  Naf 240.000 pa oumentá konsiensia históriko bou di nos pueblo

Union den Diversidat Naf 110.000, pa investigashon di e situashon di diversidat kultural kurasoleño

Un suma di Naf 200.000 pa organisá Dia di Bandera.

Comments (0) >>

Show/Hide comments

Write comment

Show/Hide comment form

Name

Email

Comment

Add Comment