| Detenshon di 4 sospechoso pa kontrabanda di hende |
|
|
|
| Wednesday, 25 February 2009 - 20:12 | |
 Ku detenshon di e 4 sospechosonan di awe mainta tempran, Kuerpo Polisial di Kòrsou ku kolaborashon di Kuerpo Polisial di Sürnam i ku sosten di Marechaussee di Marina a pone un fin na e aktividatnan di un organisashon kriminal ku ta okupá nan mes ku kontrabanda i negoshi di hende for di Sürnam pa Trinidat i Kòrsou.Kuminsamentu di e aña aki outoridatnan di Sürnam a aserká Ministerio Públiko di Kòrsou ku e petishon pa investigá un kantidat di víktima ku a keda privá di nan libertat i pa detenshon di e sospechosonan enbolbí den e kaso aki.E sospechosonan primeramente a biaha di Trinidat pa Kòrsou i bou di menasá nan a obligá un kantidat di víktima pa biaha huntu ku nan. Klik read more pa mas informashon.
Investigashon a wòrdu hasi dor di Kuerpo Polisial Kòrsou, bou di
direkshon di Ministerio Públiko i ku kolaborashon estrecho ku e
miembronan di Kuerpo Polisial di Sürnam pa sa paradero di e
sospechosonan i e víktimanan.
Awe mainta tempran un team di investigashon a bai na un kas na Sta. Catharina pa un búskeda den un kas.Den e kas tabatin 4 sospechoso (2 hòmber i 2 dama), i 5 víktima (2 hòmber i 3 dama), nan tur ta prosedente di Sürnam. E sospechosonan a wòrdu detené na e sitio i nan mester aparesé dilanti Prokurador General pa despues entregá nan na outoridatnan di Sürnam. Mientrastantu tur e víktimanan a bira personanan ilegal riba nos isla. Kuerpo Polisial Kòrsou lo pèrkurá pa e víktimanan por haña yudansanan nesesario c.q. guia. Informashon a fondo E sospechosonan prosedente di Sürnam tabata reklutá hòmber i muher pa traha na Hulanda. (den horeca). E sospechosonan tabata bisa e hendenan ku nan mester bai Trinidat promé pa por a sigui un kurso di horeca pa despues nan biaha pa Hulanda. Despues di paga un kantidat enorme di plaka (míles di euro), ta transportá desena di hòmber i muhé for di Sürnam pa Trinidat. Ora e víktimanan aki yega nan destino, ta kita nan pasport i ta obligá nan pa traha trabou pisa den i rondó di kas di e sospechosonan. Ademas e víktimanan ta wòrdu maltratá i obligá pa pidi nan famianan ku a keda atras na Sürnam pa manda sèn pa nan. E sèn aki finalmente ta bai pa e sospechosonan. Despues ku e sospechosonan a haña sa ku outoridatnan di Sürnam ta nan tras i ku e outoridatnan di Trinidat ta na altura di nan forma di proseder, nan a hui for di Trinidat pa Kòrsou. Un kantidat di víktima ku tabata na Trinidat a mira e oportunidat pa nan hui i bai Sürnam bek, na unda e outoridatnan di Sürnam risibí nan. E sospechosonan a obligá un kantidat di e víktimanan pa biaha huntu ku nan pa Kòrsou, kaminda ku nan a yega den luna di novèmber i desèmber 2008. E sospechosonan tabata prepará pa ehersé e mesun práktika na Kòrsou, dor di nan detenshon di awe mainta a evitá esaki. Nòmber di e sospechosonan ta: 1) D.B., Sürnam 29 aña; 2) P.R.C. Sürnam 23 aña; 3) A.R.N. Sürnam 22 aña; 4) A.S.R. Sürnam 22 aña. |
