|
Ramiro a celebra su di 40 aniversario na KLM |
|
|
|
|
Thursday, 19 February 2009 - 09:49 |
|
 Den e mesun
aña ku KLM ta para ketu na su 75 añanan di presensia den e área aki,
personal di KLM na Kòrsou a selebrá ku nan kolega kerí Ramiro Schotborgh
tin mas ku mitar di e kantidat di aña kaba den servisio. Dia 13 di
febrüari 1969 na edat di 20 aña el a kuminsá na KLM komo empleado
di depósito. Na e ofisina prinsipal di e tempu aya den Punda e tabata
regla distribushon di material di propaganda i di ofisina di KLM pa
destinashonnan den Latino Amérika i e tabata yuda ku tur sorto di kos.
Despues el a bai pa e sekshon di reservashon kaminda ya 16 aña pasá
el a haña e promoshon di ta Supervisor di KLM su ofisina di pasashi,
aktualmente den e sentro komersial Promenade. Klik read more pa lesa mas.
Tantu na KLM komo den komunidat
Ramiro Schotborgh ta konosí komo un persona agradabel den su forma
di anda i ku ta hasi hopi trabou sosial den su tempu liber. Pa hopi
aña e ta shopsteward di CFM na KLM. Pa hopi tempu e tabata konosí
tambe komo fanátiko aktivo den karnaval; por ehèmpel el a guia e grupo
di karnaval sumamente eksitoso Pa Tapa Tapasolo te ora a konvertí esaki
den un fundashon ku ta organisá aktividatnan sosial-kultural sostené
pa 80 voluntario.
Djamars anochi Ramiro Schotborgh
tabatin un fiesta den Latin Café na Mahaai ku famia, amigu, konosí
i koleganan pa selebrá e bunita logro aki. Aparte di diferente regalo
el a haña tambe e pen spesial di KLM pa 40 aña di servisio leal ku
Gerente General Wim Iserief di KLM a dun’é. Un punto kulminante di
e anochi tabata ora komo sorpresa adishonal Rei di Tumba Tico Balentien
a drenta na stail pa presentá su tumba ganadó ‘Den Bahia’.
Riba potrèt:
E hubilario Ramiro Schotborgh ku su dash’i-pushi huntu
ku KLM su gerente general Wim Iserief
durante e anochi festivo.
| Comments () >> |
 |
 |
