Mester di lei di protekshon di nos naturalesa riba tera urgente. Introdukshon di leinan lo tene e isla atraktivo pa turistanan i ta hasi ku Boneiru ta traha riba un desaroyo duradero. Esaki no ta nifiká ku ta solamente nos, pero tambe nos yunan por konstruí un bon futuro.Basá riba e ordenansa di maneho di naturalesa nobo, Gobièrnu di Teritorio Insular di Boneiru a diseñá dos dekreto di ehekushon. Un dekreto di ehekushon ta atendé maneho di naturalesa en general. E otro ta bai tokante di e parke di bida bou di laman. Promé ku Kolegio Ehekutivo ratifiká e diseñonan aki, Gobièrnu lo diskutí nan kontenido ku tur partido enbolbí.Klik read more pa lesa mas.

Boneiru ta mundialmente konosí pa su parke marino. E fama aki ta danki na partikularmente e protekshon legal di nos mundu bou di awa. Ta di einan nos ta kosechá awendia e frutanan ekonómiko. Nos prosperidat a subi e último desenanan di añanan. Ta importante pa no protehá solamente e bida marino, pero tambe e naturalesa riba tera. Naturalesa di Boneiru tin hopi di ofresé na habitantenan i turistanan. Den e dekreto di ehekushon di maneho di naturalesa nobo a pone reglanan general pa protekshon di naturalesa.

E dekreto di ehekushon ta kuminsá regla asuntu di entrada den e parkenan di naturalesa. Esaki lo keda pa gran parti manera e ta aktualmente. Loke ku ta nobo ta ku kompanianan manera di guianan di turista ku ta hasi uso di Parke Washington Slagbaai pa praktiká nan negoshi, lo tin ku bai paga un kompensashon anual.

Tambe ta regla protekshon di áreanan di naturalesa. Ta prohibí pa saka matanan òf bestianan for di e parke di naturalesa, sin un pèrmit di Kolegio Ehekutivo. Tambe tin prohibishonnan pa saka santu, basha sushi, drenta ku arma di yag, drenta ku bestianan di kas, sende kandela etc.. Pa e protekshon di e áreanan di naturalesa por stipulá áreanan di reserva. Pa e áreanan di reserva rondó di parkenan di naturalesa tambe a stipulá reglanan pa aktividatnan ku por tuma lugá na e sitionan ei.

E siguiente paragraf ta bai tokante di protekshon di sortonan di bestia i mata. Tin espesienan ku ya kaba tin protekshon di akuerdonan internashonal. Esaki ta konta pa entre otro lora, warawara, kinikini, ganshi, tur turtuga, dòlfein i bayena. Fuera di esaki Gobièrnu di Boneiru mes tambe por apuntá otro sortonan protehá. Pa esaki a traha un lista di espesienan di para, mamífero (raton di anochi), algun tipo di piská, tribon, kref, koral, pal’i mangel, yerba di laman, palu i mata. Pa traha e lista aki a uza e siguiente kriterionan: nan ta riba e lista kòrá di espesienan menasá di World Conservation Union (IUCN), tiponan endémiko (sortonan ku ta paresé solamente akinan) i banda di esei tiponan skars òf menasá, ku ta menasá lokalmente, ku ta di interes ekológiko (espesienan kardinal), ku ta suheto na preshon grandi di eksplotashon; ku tin balor turístiko, ku ta ophetonan (potensial) di kolekshon. Tin biaha a skohe pa protehá henter un grupo, na lugá di sortonan individual, komo ku laikonan no por mira e diferensha entre e sortonan. Esaki ta konta pa koralnan, tribonnan i ratonnan di anochi.

Pa e protekshon di e paranan, Kolegio Ehekutivo por instruí doñonan di e mastnan, wayanan di koriente i otro konstrukshonnan, pa tuma medidanan pa evitá ku paranan ta wòrdu heridá.

Pa kapmentu di palunan i kadushi i yatunan ku un diameter di mas ku 75 cm, mester di un pèrmit. Esaki ta pa protekshon di palunan bieu i monumental; i kadushi i yatunan. Banda di esei mester di pèrmit tambe pa kita pal’i mangel, wayaká, i bushi, ku e eksepshon si esakinan ta riba un tereno pa kua a duna un pèrmit di konstrukshon.

Por obligá esnan ku tin un palu di lechi riba nan tereno pa laga kita esaki. Esaki ta un palu ku ta dañino. A apuntá e palu di nim (neem tree) komo posibel palu dañino. Kolegio Ehekutivo por eksigí medidanan pa evitá ku e palu aki ta sigui plama.

Den e dekreto di ehekushon tin pone tambe pa kua aktividatnan mester traha un rapòrt di efekto riba medioambiente. Ta trata aki di aktividatnan manera konstrukshon di obranan infrastruktural, industrianan, kobamentu di mineralnan den suela, konstrukshon di plantanan di energia i turbinanan di bientu, konstrukshon di terenonan di gòlf i konstrukshon di akomodashonnan di estadia di mas ku 10 kamber den áreanan di naturalesa. E prosedimentu pa un rapòrt di efekto riba medioambiente ta reglá den un suplemento.

Por último ta reglá ku STINAPA ta enkargá ku e parkenan di naturalesa di Boneiru i ku pa esaki lo mester sera un kombenio entre e atministradó i Gobièrnu.

Comments (0) >>

Show/Hide comments

Write comment

Show/Hide comment form

Name

Email

Comment

Add Comment