E kampaña di bandana “Hala Pega” di Fundashon Kòrsou Limpi Bunita (FKLB) a ranka sali.  A repartí siman pasá un kantidat di 2.500 bandana na Festival di Tumba i otro aktividatnan karnavalesko. E intenshon ta pa repartí un total di 10.000 bandana durante tur aktividatnan di Karnaval. Riba e bandana, ku ta konsistí di diferente kolo, tin un di e 3 tekstonan: “Karnaval” òf “Limpi” òf “Bunita”.  Meta di e kampaña úniko aki ta pa ilustrá ku si nos ke logra un isla limpi i bunita nos mester uni ya ku union ta hasi forsa. E kampaña mester sirbi pa konsientisá i motivá komunidat pa huntu nos tene nos isla limpi. Kada un di nos mester karga nos responsabilidat sosial pa hasi esaki. Tambe durante di goso i alegria limpiesa por trese nos mas serka di otro i asina aki nos por forma e union sosial.